ರಾಮನಗರ ಜಿಲ್ಲೆಯ ಕನಕಪುರ ತಾಲೂಕಿನಲ್ಲಿ ದೇಶದ ಮೊದಲ ಮಹಿಳಾ ಕೈಗಾರಿಕಾ ಪಾರ್ಕ್ ಪ್ರಾರಂಭವಾಗಲಿದೆ. ಈ ಕೈಗಾರಿಕಾ ಪಾರ್ಕ್ ಹಾರೋಹಳ್ಳಿ ಕೈಗಾರಿಕಾ ವಲಯದಲ್ಲಿ ಪ್ರಾರಂಭವಾಗಲಿದೆ. ಇದು ಮಹಿಳೆಯರಿಗೆ ಮೀಸಲಾದ ಮೊದಲ ಕೈಗಾರಿಕಾ ಪಾರ್ಕ್ ಆಗಿದ್ದು 105 ಮಹಿಳಾ ಉದ್ಯಮಿಗಳು ಅರ್ಜಿ ಸಲ್ಲಿಸಿದ್ದಾರೆ ಮತ್ತು ಅವರಿಗೆ ಭೂಮೀ ನೀಡುವ ಪ್ರಕ್ರಿಯೆ ಚಾಲನೆಯಲ್ಲಿದೆ. ಮುಖ್ಯಮಂತ್ರಿ  ಸಿದ್ದರಾಮಯ್ಯ ಈ ಕೈಗಾರಿಕಾ ಪಾರ್ಕ್ ಉದ್ಘಾಟಿಸಲಿದ್ದಾರೆ.

ಈ ಪರಿಕಲ್ಪನೆಯನ್ನು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿ ಶ್ರೀಮತಿ ರತ್ನ ಪ್ರಭಾ ಅವರು ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿಯಾಗಿದ್ದಾಗ ರೂಪಿಸಿದ್ದು ಇದನ್ನು ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆ ಕೆಐಎಡಿಬಿ ಅಡಿಯಲ್ಲಿ ಯೋಜಿಸಲಾಯಿತು. 

ಇದು ಹಾರೋಹಳ್ಳಿ ಕೈಗಾರಿಕಾ ಪಾರ್ಕ್‍ನ ಮೂರನೇ ಹಂತದಲ್ಲಿದ್ದು 1,366 ಎಕರೆಗಳ ವಿಸ್ತೀರ್ಣ ಹೊಂದಿದೆ. ಇದರಲ್ಲಿ 106 ಎಕರೆಗಳನ್ನು ಮಹಿಳೆಯರಿಗೆ ಮೀಸಲಾಗಿರಿಸಲಾಗಿದೆ. ರಸ್ತೆಗಳು, ಒಳಚರಂಡಿ ಮತ್ತು ಕುಡಿಯುವ ನೀರಿನ ಸೌಲಭ್ಯಗಳನ್ನು ಪ್ರಾರಂಭಿಸಲಾಗುತ್ತಿದೆ. ರಾಜ್ಯ ಸರ್ಕಾರ ಈ ಯೋಜನೆಗೆ 37 ಕೋಟಿ ರೂ. ವ್ಯಯಿಸುತ್ತಿದೆ. ಈ ಕೇಂದ್ರಕ್ಕೆ ಎಂಎಸ್‍ಸಿ ಸಿಡಿಪಿಸಿ ಯೋಜನೆಯಡಿ 7.5 ಕೋಟಿ ರೂ. ಅನುದಾನ ನೀಡಲಾಗುತ್ತಿದೆ.

ಪ್ರಸ್ತುತ ರಾಜ್ಯದಲ್ಲಿ ಮಹಿಳಾ ಉದ್ಯಮಿಗಳ ಸಂಖ್ಯೆ ಬಹಳ ಕಡಿಮೆ ಇದೆ. ಈಗಾಗಲೇ ಮಹಿಳೆಯರ ಗುಂಪುಗಳು ಮತ್ತು ಮಹಿಳಾ ಉದ್ಯಮಿಗಳಿಂದ ಬೇಡಿಕೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಕೈಗಾರಿಕಾ ಉದ್ಯಾನ ಪೂರ್ಣಗೊಂಡ ನಂತರ ಮಹಿಳಾ ಉದ್ಯಮಿಗಳ ಸಂಖ್ಯೆ ಹೆಚ್ಚಾಗಲಿದೆ ಎಂದು ಸರ್ಕಾರ ಭರವಸೆ ಹೊಂದಿದೆ. 

ಮಹಿಳೆಯರನ್ನು ಯಶಸ್ವಿ ಉದ್ಯಮಿಗಳನ್ನಾಗಿಸಬೇಕು ಎಂದು ರಾಜ್ಯ ಸರ್ಕಾರ ಗುರಿ ಹೊಂದಿದೆ. ಹಾರೋಹಳ್ಳಿ ರಾಜಧಾನಿಗೂ ಬಹಳ ಹತ್ತಿರದಲ್ಲಿದೆ. 

ಬಿಡಬ್ಲ್ಯೂಎಸ್‍ಎಸ್‍ಬಿ ಮತ್ತು ಬೆಸ್ಕಾಂಗಳು ನೀರು ಮತ್ತು ವಿದ್ಯುಚ್ಛಕ್ತಿ ಪೂರೈಕೆ ಮಾಡಲಿವೆ. ಕೆಐಎಡಿಬಿ ಪ್ರತಿ ಎಕರೆಗೆ 1.4 ಕೋಟಿ ರೂ. ಬೆಲೆ ನಿಗದಿಪಡಿಸಿದೆ. ಮಹಿಳೆಯರಿಗೆ 10 ಲಕ್ಷ ರೂ. ರಿಯಾಯಿತಿಯನ್ನು ದೊರೆಯಲಿವೆ. 10 ಗುಂಟೆಗಳಿಂದ 2 ಎಕರೆಗಳವರೆಗೆ ಜಮೀನು ವಿಂಗಡಿಸಲಾಗಿದೆ. ಸಣ್ಣ ಕೈಗಾರಿಕೆಗಳ ಹಲವು ಉದ್ಯಮಿಗಳು ಇದರ ಪ್ರಯೋಜನ ಪಡೆಯಲಿದ್ದಾರೆ. 

ರಾಜ್ಯ ಸರ್ಕಾರ ಎಲ್ಲ ಅರ್ಜಿಗಳೂ ಏಕಗವಾಕ್ಷಿ ವಿಲೇವಾರಿ ವ್ಯವಸ್ಥೆಯ ಅನ್ವಯ ಇರಬೇಕು ಮತ್ತು ಅರ್ಜಿ ಸಲ್ಲಿಸಿದವರಲ್ಲಿ ಶೇ.25ರಷ್ಟು ಮಂದಿ ಮೊದಲ ಬಾರಿಗೆ ಉದ್ಯಮಿಗಳಾಗುತ್ತಿದ್ದಾರೆ ಎನ್ನುವುದು ಗಮನಾರ್ಹ. ಹಲವು ಮಂದಿ ನಗರದ ವಿವಿಧ ಪ್ರದೇಶಗಳಲ್ಲಿ ಸಣ್ಣ ಸ್ಥಳಗಳಲ್ಲಿ ಉತ್ಪಾದನಾ ಘಟಕ ನಡೆಸುತ್ತಿದ್ದಾರೆ ಮತ್ತು ಈ ಹೊಸ ಕೈಗಾರಿಕಾ ಉದ್ಯಾನಕ್ಕೆ ವರ್ಗಾಯಿಸಿಕೊಳ್ಳಲು ಉತ್ಸುಕರಾಗಿದ್ದಾರೆ. 

ಉಡುಪು, ಆಹಾರ ಸಂಸ್ಕರಣೆ, ಅಡುಗೆ ಉಪಕರಣಗಳು, ರಾಸಾಯನಿಕಗಳು,ವಾಹ ಬಿಡಿ ಭಾಗಗಳು ಮತ್ತಿತರೆ ಘಟಕಗಳು ಇಲ್ಲಿವೆ. ಈ ವಿಶೇಷ ಮಹಿಳಾ ಕೈಗಾರಿಕಾ ಉದ್ಯಾನ 5,000ಕ್ಕೂ ಹೆಚ್ಚು ಉದ್ಯೋಗ ಸೃಷ್ಟಿಸಲಿದೆ.